太忙另一半詐型　陳凱詠：互相遷就一齊行

環球新人陳凱詠（Jace）最近推出第二首主打歌《想正常》，講述男女關係的磨合：「講兩個人喺關係入面總會諗係咪自己唔夠好，定對方唔夠遷就，但其實唔使計較咁多，有時你退後一步，有時我行開一步，好似跳舞就得。」她坦言很愛分析：「我會諗我咁做佢會咁咁咁，但結果我辛苦又搞到人哋都辛苦。」她又透露之前拍拖試過太忙而搞到與另一半有磨擦：「我鍾意搞到啲時間好充實，但對方就會覺得我係咪唔重視佢，或者話我唔畀時間自己休息，但其實我同佢都冇錯，以前會諗如果我遷就咗佢係咪就放低咗自己嘅價值，其實唔使諗咁多，佢想陪多啲我又得嘅咪陪下，唔得嘅佢都應該要明白，互相遷就一齊行就得。」而提到現時感情狀況，她就謂不敢想這方面，因想專心做好自己，有很多事要學習。

提到她在新歌中又作曲又唱又跳又rap，問到可是想做全方位歌手？她謂：「冇刻意諗自己嘅路向，自己仲係好新，未知人哋想要啲咩，更加未知自己鍾意做啲咩、適合做啲咩，點解唔趁可以嘅時候，公司又畀好多空間我，不如就玩多啲先，我係一個好多心嘅人，鍾意做好多唔同嘅嘢，例如之前冇諗過會鍾意作曲，點知做做下又OK，跳舞就由細到大都鍾意跳，所以趁今次節奏感強嘅歌就跳埋舞。」

講到做歌手前有拍劇及做主持，問到可是細細個就想入行？Jace笑言：「我好乖，細個淨係覺得要讀書，然後讀大學，讀咩咪做咩，唔係好敢諗呢啲，亦唔敢話畀人知，怕畀人笑發明星夢，所以自己收埋，鍾意唱歌咪自己寫下，鍾意跳舞咪上下堂，但之後好幸運入咗環球做主持，遇到好多唔同機會嘗試，做主持見到好多音樂人，自己吸收緊養份，之後拍嘢又覺得演員好好玩，所以好幸運，呢段時間試咗好多唔同嘢，依家算係實現咗夢想一小步，所以會更加珍惜機會，慢慢追求夢想。」

---------------

立即參加「賞您睇」：　https://tinyurl.com/y2e6pmwk

Click下面粒掣，儲on.cc coins！機票、家電、超市禮券、過萬份獎品等緊你。