三車連環相撞 吳若希:囡囡嚇到喊!

2019年10月23日 23:28
東網電視
更多新聞短片
真係嚇親!
藝人吳若希(Jinny)到電視城出席《娛樂大家》錄影,原來其老公昨日早上撞車,她解釋事發經過:「老公車個女去返學,我都係聽佢講番,佢話前面架車急停,佢dup唔切撞咗上去,本身前面架車已撞人個尾,佢再撞上去,total係三車相撞。」她表示幸好老公和囡囡都冇事:「BB有喊,都有嚇親,但好彩兩個都冇大礙,我聽到佢個電話都嚇親,但最緊要係人冇事,個女都冇返學,好彩冇事,錢財身外物,人冇咗就冇咗。」她又謂今日囡囡如常返學:「搭公共交通工具送佢番學,搭小巴轉港鐵,再轉巴士,一個鐘之內都送到返去。」
她表示車有損毁,但不知維修要多少錢,並笑言已經準備買新車:「都急住用車,可能呢兩日要買番架車,我哋原本都諗住買新車嘅,所以我覺得老公係特登嘅,知我想換車。(換咗新車會唔會唔畀老公揸車?)盡量我揸啦,或者請司機。」她又謂現時都是買家庭車,有周圍問人搲折頭。記者打趣叫老闆送車,她即笑言:「邊個老闆?依家個女係我老闆,Herman(何哲圖)已經變咗做屋企人,不過佢都好關心,打咗3次電話嚟,叫我安慰佢哋,同埋叫我唔好鬧老公,我話我冇鬧佢,仲鬧咩呀。」她又笑言用了整日時間才接受到撞車這個事實,以為撞車是發夢,到昨晚才接受架車撞咗。
---------------
立即參加「賞您睇」: https://tinyurl.com/y2e6pmwk
Click下面粒掣,儲on.cc coins!機票、家電、超市禮券、過萬份獎品等緊你。