度身訂造行程！黎諾懿帶小春雞遊沖繩

藝人黎諾懿囝囝黎峰睿（小春雞）兩歲幾，依家讀緊學前班，日前難得學校有Term Break，一家三口即時安排沖繩遊，而行程更係為小春雞度身訂造，黎諾懿話：「沖繩好啱小朋友玩，帶阿仔去玩高空瀡滑梯，都有兩三層高，佢就咁瀡落嚟，一啲都唔驚，仲由天光瀡到天黑唔捨得走。」

見到恐龍驚到喊

一家人之後又去咗動物園，黎諾懿表示：「嗰度可以坐火車圍住動物園行，同啲動物近距離接觸，咁都想阿仔除咗喺書本睇到外，可以親身接觸吓啲動物，但當我哋去咗侏羅紀公園，佢見到啲恐龍驚到喊。」此外，沖繩最出名當然是沙灘，佢話：「當然有去沙灘，啲水都係好清好乾淨，好似屋企泳池啲水。」講到一年去幾次日本，黎諾懿就笑言因為阿仔鍾意食日本嘅壽司同烏冬，認真係廿四孝爸爸！

---------------

立即參加「賞您睇」： https://tinyurl.com/y2e6pmwk

Click下面粒掣，儲on.cc coins！機票、家電、超市禮券、過萬份獎品等緊你。