陳星太太想為亡夫搞追思會　吳思遠：盡力幫手

拍片無數的資深動作演員陳星離世，其太太第一時間通知丈夫好友吳思遠，吳思遠表示：「佢9月4日喺印尼離世，冇病痛嘅，係瞓瞓吓覺走。」又指陳星多年前移居加拿大，近年則在印尼居住，去年曾回港，當時透露經濟不太好，吳思遠即與香港動作特技演員公會予以幫助：「當時我哋都冇問原因，即刻幫手，錢嘉樂（公會會長）都係，知道陳星走咗，佢都第一時間問有冇嘢要幫手。」吳思遠指陳星育有一子，並且是鋼琴好手，可惜兩年前因癌症離世，當時陳星悲傷不已。

陳星與太太結婚四十年，如今先後痛失丈夫及兒子，令她痛心不已，早前更大病一場，如今她只希望幫丈夫在香港搞追思會，並請吳思遠幫手，吳思遠表示：「佢本來都有唔少影片、相片嘅，但當年住多倫多嘅時候，畀人偷晒，所以佢請我幫忙搵一搵，我都會盡力幫手，但呢排香港咁亂，追思會都會叫佢遲啲先搞。」