粉絲唔撐同富二代拍拖　陳喬恩首正面回應

曾經被封為「黃金盛女」之一嘅藝人陳喬恩，早前參加內地綜藝節目《女兒們的戀愛》成功脫離單身行列，同細佢9歲嘅馬來西亞富二代曾偉昌（Alan）拍拖，原本係一件開心事，不過佢啲粉絲唔太接受男方，仲喺網上大爆Alan嘅溝女黑歷史，仲話要「脫粉」希望偶像回心轉意！

呢日陳喬恩喺社交網發文想同粉絲傾吓偈，唔少粉絲都留言叫偶像放棄Alan，覺得男方配唔起偶像等等，熱戀中嘅陳喬恩回覆都幾強硬，話做乜嘢都想同粉絲分享包括拍拖：「看完覺得有點可愛，我談戀愛也是沒有隱瞞也跟大家分享，每個人都有自己的想法和喜好，我也沒有強求去支持我的戀愛，有些人能接受有些人無法接受，我覺得都可以，彼此尊重，這才是好的方式。」睇嚟陳喬恩都係決定戀愛至上，相信都唔會理粉絲嘅反對聲音。