遭封殺一年　吳秀波蒲頭試水溫繼續被噓

內地男星吳秀波去年被爆婚外情後形象插水，與小三陳昱霖更被鬧上法庭，最後吳秀波喺娛樂圈「被消失」遭全面封殺，敗走美國。雖然佢久不久都會出席友人聚會蒲吓頭，不過近日有指佢都想回歸幕前，今日就有神秘網友喺大陸短片平台晒出吳秀波露面短片，為藝考弟子打打氣，見佢面帶笑容錄製祝福影片：「我是吳秀波，祝學子們藝考一切順利，長路漫漫未來可期，祝你們金榜題名，加油！」疑試水溫，不過網友就唔多受落，負評如潮，更有網友留言寸爆問：「不知道錄這種祝詞影片可以收多少酬勞」唔知今次試完水溫，吳秀波仲係咪繼續堅持復出呢？