今日娶黃天頤　C君凌晨搵小朋友上頭

組合農夫成員C君今日與拍拖5年的電台DJ黃天頤拉埋天窗，見佢兩個「未出發」先興奮，先後腳喺今日凌晨上載各自上頭嘅相，當中C君就搵咗老友監製個仔上頭，事關有師傅睇過話位小朋友會行80年大運，名副其實係「好命人」，認真搞笑：「聽聞上頭要搵個『好命人』幫手，圖中嘅小朋友係我老友大監製周生個公子，蘇師傅口中將會有80年大運嘅人，行運行到九十幾，行80年運都相信係我認識最好命嘅人，有佢幫我上頭，呢次掂喇師傅！」而黃天頤都唔輸蝕，搵嚟媽咪嘅閨蜜幫手，兩個人未做兩公婆就先爭搵好命人，睇嚟婚後屋企一定會好熱鬧呀！

而好友就上載一對新人嘅合照，見二人着上傳統禮服，笑容滿面，非常幸福。