舊拍檔黃愷怡新婚　單文柔騷長腿搶Fo

無綫節目《東張西望》外景主持黃愷怡（Jasmin）尋日與初戀機師男友Billy結婚，新人日頭於教堂行禮，曾一同為兒童節目《THINK BIG天地》擔任主持嘅單文柔、鍾晴、鍾君揚現身觀禮，單文柔撇甩老公陳展鵬及囡囡小豬比單拖出席，以短褲上陣大騷長腳，搶眼過新娘子！

而晚上婚宴於尖沙咀一間酒店舉行，一對新人喺迪士尼主題曲下跳舞，非常浪漫。見到賓客有黃建東、鄺潔楹、陳詩欣、陳約臨、周佩婷等均出席，齊齊拍動態片，相當熱鬧，當中曾惡搞陳偉霆英文廣告「What Time Is It?」嘅黃建東，現場即席演繹，認真抵死！