巴黎睇時裝騷　溫碧霞獲法國導演邀拍戲

女星溫碧霞（Irene）放完大假回港後隨即開工，日前又飛往巴黎，應婚紗晚裝品牌邀請欣賞時裝騷。品牌為Irene度身挑選一襲簡約而仙氣十足的透視薄紗晚裝，與Irene溫柔中帶硬朗的氣質配合得天衣無縫，在場搶盡鏡頭，不單止引來現場賓客目光，連法國導演也一眼睇中香港女神Irene並邀請到法國拍攝新片！

講到被法國導演邀拍戲，Irene開心說：「係呀！呢位法國導演想開拍一部講述一位中國女仔喺法國遇到嘅故事，佢想邀請我演呢位中國女仔，佢話我好啱呢個角色。（答應咗未？）呢個交畀經理人去傾，最緊要睇吓劇本，不過都好開心，每次到法國都好似好幸運，次次嚟法國都聽當地人講前幾日仲落緊雨，但我到埗就停雨，仲陽光普照，今次又係咁，所以好開心天氣好，陽光又好，仲遇到法國導演邀請拍戲，唔理成唔成功已經好開心。」