勁歌歌衫車禍　石詠莉邱芷微出晒事

《2019年度勁歌金曲頒獎典禮》今晚在將軍澳電視城舉行，眾歌手行紅地氈時，未爭獎先爭風頭，好像譚嘉儀和JW都低胸露線、曾樂彤則短裙晒長腿，搶奪歌迷眼球，但偏偏石詠莉就揀了一襲啡色條子不規則裙子配短靴，裝扮相對極Hea，像在衣櫃隨手拿一條裙就着上身一樣，與頒獎禮格格不入。

另外，不少歌手都不約而同裝扮復古風，好似同穿白的許靖韻、戴祖儀和泳兒，將簡單的白，襯得仙氣十足；有人仙氣，有人就激氣，好似邱芷微的黑白碎花傘裙，就十足穿了一條大餐巾上身，胸前仲掛了一大條頸鏈，咁都着得出頒獎禮，認真時裝車禍。