陳敏之公開獨門陳皮魚蛋秘訣　網友爭住落Order

藝人陳敏之自從榮升媽媽育有一子雷子樂後，就不時為小朋友親自下廚，練得一手好廚藝，佢昨晚凌晨2點突然喺社交網開live，分享炮製獨門陳皮魚蛋，深夜晒美食引到一班網民直呼流晒口水！佢透露由於老公肚餓想食消夜，身為廿四孝太太嘅佢當然有求必應，佢仲話呢款魚蛋廣受好評，就連好友黃翠如都食過翻尋味。而原來咁好食嘅秘訣，除咗透露有香辣醬之外，就係落花生醬吊味，見啲魚蛋粒粒上色均勻賣相滿分，真係睇見都想食，難怪網友紛紛留言落order，話想試下敏之嘅手勢啦。