東方日報C1:楊千嬅用靈魂傾偈保鮮「姊弟戀」

20200120
東網電視
更多新聞短片
幸福人妻無懼年齡差距。
「多功能老婆」楊千嬅在電視劇中與「Oppa榮浩田」的「姊弟戀」相當甜蜜,如同現實生活中千嬅與老公丁子高一樣幸福滿瀉,就連粉絲Yumi也以偶像做人辦,千嬅不但傳授整餅冧招,更教粉絲保鮮「姊弟戀」的秘方。
歌影后集於一身的千嬅應本報邀請為東網自家炮製的《我和星星有個約會》節目擔任嘉賓,出得廳堂得入廚房的她親教來自澳門的新任人妻鐵粉Yumi整蛋糕,Yumi說:「啱啱結婚,我好想親手整蛋糕送畀老公。」連千嬅都大叫「好sweet!」最搞笑千嬅見到Yumi這個靚女,最初還擺烏龍以為她在餅店打工,非常爆笑!千嬅覺得識整蛋糕的女子感覺溫婉、有氣質,她自嘲說:「你知我個樣啦,生完小朋友之後學識整甜品,依家加咗一分母愛喺塊面度。」
唔好變咗老奉
千嬅與比她年輕五歲的丁子高已結婚十年,Yumi的老公同樣比她細兩歲:「丁生都係細過你,你做嘅嘢我好相信,跟住發覺揀細過自己嘅老公係得嘅。」千嬅坦言以前社會一些傳統家庭可能會緊張年紀的事,但她覺得:「兩個人生活溝通到咪得囉,細過自己又好、大過又好,都要兼顧好平衡,唔好結咗婚就變成老奉,要有個責任。」她又分享與丁生婚姻「保鮮法」,她坦言婚姻是一輩子的學問:「我同丁生都好明白,大家喺性格上好需要有互補不足嘅地方,互相包容去成就一個幸福嘅家庭,所以大家成日要有溝通,因為每個人性格唔一樣,必需要付出耐性,真係要用靈魂去傾偈,得閒可以用一個朋友身份坐低去傾吓,講吓大家感受,互相為一個家庭努力落去。」
「糕」手過兩招
對紫色情有獨鍾的千嬅,不但穿上紫色衞衣,還染了紫紅色頭髮,更教Yumi整紫薯蛋糕,在整蛋糕過程中,餅店師傅間中會從旁指導,而千嬅手勢熟練,Yumi全程跟住去做,更獲千嬅讚賞:「你啲手勢都好專業。」千嬅囝囝Torres都愛入廚整蛋糕,曾經在工人姐姐幫手下整蛋糕給她吃,千嬅爆囝囝志願是做廚師,更加以鼓勵說:「佢真係咁講,佢想做廚師,我話好呀,小朋友有夢想係好事,最緊要係決定咗咁做,就要做到同做得好好。」她最後更以過來人身份提醒Yumi想生小朋友就要趁早:「我就冇辦法,我係高齡產婦!當然你要諗清楚,但正面啲去諗,有咗小朋友你做乜都醒神,夫婦二人亦會有共同話題同目標,嗰種快樂係第二種快樂。」
更多新,請瀏覽東方日報網頁: