一鬧交就想分手　鄧健泓記住四樣嘢即解決

藝人鄧健泓與太太石詠莉下午到電台受訪，話題涉及夫妻相處之道。問到二人可有試過吵大鑊，他們異口同聲表示：「梗係有，我哋好少鬧交，但鬧得都好大鑊，差啲要分手。」石詠莉笑說：「每次鬧交，佢都會無限loop咁講佢嘅內心感覺，好彩佢都聽人講，但要冷靜咗先得囉。」鄧健泓則謂：「點樣都好，要記得大家拍拖嘅初心、心動嘅感覺，當初點樣會愛上佢，咁就乜問題都可以解決。相愛嘅人要記得四樣嘢，包括改變自己、包容、原諒同埋付出，咁彼此走落去就會容易啲。」

談到日前大讚鄧健泓是「潛力股」，石詠莉續說：「我老公真係好好，無論對朋友及家人都好盡責，呢種男人依家好難搵到喇。」鄧健泓聞言即謂：「大家聽到係咪想嘔呢？」提到石詠莉提前與經理人及唱片公司解約，鄧健泓補充說：「係因為公司喺音樂理念方面同我哋有啲唔同，老闆好好，肯提前畀我哋離開，大家喺和平氣氛下解約，嚟緊會睇吓有咩唱片公司可以合作，如果唔係我哋會回復以前咁自資製作，維持每年起碼有兩首原創歌。」