「Oppa」Hit爆　周柏豪獲奶音妹妹獻歌

雖然無綫劇集《多功能老婆》播完差唔多成個月，但佢個「後勁」真係唔可以睇少！「Oppa」周柏豪全靠劇集連掃兩個電視大獎，「最受歡迎電視男角色」、憑《多》主題曲《讓愛高飛》奪「最受歡迎電視歌曲」之餘，呢首歌仲擸埋「勁歌金曲金獎」同「最受歡迎男歌星」，認真威水！

日前Oppa就喺IG上面出Post，短片係同Fans嘅對話，入面嘅幾段Audio係一位小妹妹唱《讓》，歌聲中夾雜住「奶音」，小妹妹年紀細細唔單止對歌詞勁熟，唱到高音位仲好準添，真係齋聽聲都覺得萌爆！最後小妹妹送上「彩蛋」，一句「送畀你呀」，相信新手爸爸柏豪聽到都即刻甜入心！柏豪冧爆加上心心留言︰「有一天，我打開信箱，收到這個。小妹妹，雖然不認識你，但柏豪叔叔想祝你健康快樂，聽教聽話，成為善良的人。」一班網民都紛紛留言讚小妹妹好Sweet！