5年冇拍劇！39歲金泰希演阿媽依然省鏡

韓國39歲靚媽金泰希去年9月為韓流天王Rain誕下次女，相隔5年再拍韓劇《再見，媽媽》，將於下月接檔玄彬孭飛劇《愛的迫降》播映。

她於劇中飾演離世5年的母親，為重返人間而參加49天投胎轉世的計劃，內容描述她與喪妻後再婚並展開新生活的丈夫，以及女兒再度相遇的故事。

昨日公開新預告，飾演金泰希丈夫的李奎炯趕到警署，見到原本已離世的老婆返生，他即嚇到反白眼，更當場暈低，之後金泰希拍醒他，警方就展示寫上其妻於2015年12月車禍離世的死亡申報書，唔知最終點收科呢？

不少劇迷均大讚金泰希Keep得勁好，皮膚依然白滑，完全唔似兩女之母，仲話佢雖然5年冇拍劇，但演技都唔生疏！