闔家齊腳賀心穎牛一　逾萬網民關心畀Like？

藝人黃心穎尋日31歲生日，佢再次「出關」同家人慶生，幾姊妹仲輪住晒靚相！呢日二家姐心妙就晒出全家福，當中見到心穎父母、心慧同老公，仲有心妙一家，大家齊齊同心穎慶祝，心妙留言：「齊腳喇! Happy Birthday to Jac姨姨，全因為妳，做細嘅真係幸福啲，後面嗰位新手爸爸，下次記得bb都要入鏡，大家都要幸福快樂健康。」呢句「齊腳」真係好有意思，相信佢哋等影呢張全家福等咗好耐！心穎亦有甫出同三位家姐照，而半日已經超過1萬5千人畀like ，大家真係好「關心」佢！