李旻芳母勒令努力造人 黃耀英想生龍鳳胎

20200124
東網電視
更多新聞短片
等你哋好消息喇!
「東張CP」李旻芳(Lucy)與黃耀英(Darren)去年11月拉埋天窗,近日更趁住新年專誠到著名的灣仔姻緣石求子,揚言希望來年能生對龍鳳胎,湊夠一個「好」字!Lucy自爆媽媽恨抱孫,結婚不久已被千叮萬矚努力「造人」不設防:「我媽媽好心急,直接同耀英講唔好避,恨抱恨到出晒面。我自己都好想快啲有小朋友,最好就可以生一男一女,等佢哋唔會咁孤單。」在旁的Darren即賣口乖,表示:「最好就生對龍鳳胎,一次過搞掂,唔想太太辛苦兩次。」Lucy續指每日都會與老公預先研究育兒心得,更早已為將來的孩子訂立規矩,希望他們每天食飯前都會感恩,多謝擁有的一切事物,不要認為幸福是必然的。
未準備好做媽媽
雖然已有齊育兒計劃,但Lucy卻表示尚未完全準備好做人媽媽:「因為屋企仲有兩隻好老嘅狗狗,怕如果依家有咗,會分心唔可以專心照顧佢哋或者小朋友,所以想等佢哋百年歸老,再展開新一章。」而Darren則表示平日會趁與朋友的孩子相處時乘機「偷師」,所以已準備好做爸爸的角色,但亦自覺未算完美的長輩,故將來會邊做邊學,與子女一同進步。
期待第一年派利是
至於講到今年是婚後首個共度的農曆新年,一早設計好專屬利是封的Lucy表示最期待派利是:「已經有朋友mark定我哋,話要帶仔女嚟拜年逗利是,自己第一次派利是都好緊張,我會買定新衫,同耀英着住情侶唐裝咁出動。」而Darren則笑言由於利是封印有二人名字,故不敢派太細銀碼的利是,又笑指:「如果要入10蚊就用有旻芳名嗰啲。」