眼淚啷啷吓　蘇韻姿《愛回家》喊戲獲讚賞

藝人蘇韻姿2016年參選港姐入行，2017年加入《愛．回家之開心速遞》，演技一年比一年進步，尋晚播出的一集，講到熊家投咗個年宵攤位，但係飾演「熊心如」的蘇韻姿努力賣貨忙到爆時，卻發現兩位家姐「熊尚善」滕麗名以及「熊若水」呂慧儀喺屋企偷懶，最終冤屈爆發大哭訴，佢七情上面青筋盡現之外，由開頭含住泡眼淚，到最後激動流出真眼淚，成個過程有晒層次，呢一幕喊戲發揮出色，獲得不少網友稱讚。

對於網民大讚，蘇韻姿接受東網訪問時表示：「呢場戲都真係比我想像中好，因為嗰日要拍好多場戲係比較急，好彩咁啱我狀態好好，記對白好順利，感情無乜點斷到，多謝觀眾的支持，佢哋嘅讚賞係好好嘅鼓勵。」韻姿還表示很多謝編劇與導演，因為故仔寫得好好，同埋畀咗一個咁好既機會佢去發掘自己演技：「其實呢場戲可以再好啲，例如對白可以講清晰啲咁，有啲執着咗，未夠完美，我會畀心機新一年繼續努力，希望可以繼續進步。」