自由自在潛水好梳乎　何珮瑜有苦自己知

女星何珮瑜（Jeana）於新片演台灣海邊民宿老闆娘，為配合角色有事無事都會潛水，於開拍前特別花了一個月時間到台灣墾丁跟教練上堂，令向來喜歡落水的她大感興奮，出發前還花時間Keep Fit，以最弗身形示人。

近日Jeana把粉絲為她剪輯練習片段上載社交網，片段中着住蛙鞋及戴上眼罩的她於水底輕鬆地玩自由式潛水，令人羨慕，不過原來鏡頭以外，Jeana笑言有苦自己知：「記得拍嗰時係冬季，氣溫得16度，我每日就喺呢個度數落水，所以每次上岸都要淋熱水半粒鐘，先可以暖番個身，雖然潛水戲份喺套戲加埋得5分鐘左右，但我覺得個畫面好靚，總算對教練有個交代。」