周嘉洛攞獎派利是　呂慧儀讚衞生意識提高晒

在無綫台慶頒獎禮奪得「最佳男配角」獎項的周嘉洛今年首年派利是，他為處境劇《愛．回家之開心速遞》開工前先手寫個「掂」字贈興，十分醒目，他笑說：「自己唔知應唔應該派利是，多得丹爺（劉丹）提醒我，佢話攞咗獎冇理由唔派利是，自己第一年派利是，都係心意。」劉丹又對蘇韻姿說：「下年到你派利是喇。」寓意她出年攞獎，蘇韻姿說：「承你貴言。」

至於同劇的呂慧儀被問到錄影廠內可有加強消毒措施？她說：「每個人都戴住口罩，直到埋位先除，我亦帶咗啲消毒用品，工作人員亦都有戴口罩，大家衞生意識提高晒。」