男士都可以收花　陸浩明Hea對女友好慚愧

無綫主持陸浩明（6號）與模特兒女友陳詩欣（Ayan）拍拖8年，一直恩愛更不時給予驚喜添情趣，但今個情人節他卻感到有點慚愧，因為在送禮物方面自覺得點Hea！6號稱：「因為新冠肺炎疫情，我哋都冇乜出街，所以冇乜買到好特別嘅禮物，只係送咗兩個公仔同朱古力，但女友又好有心思，佢用紙黏土做咗個甜筒花送畀我，男仔收花都係第一次，甜筒上仲做咗一男一女公仔，代表我同佢，好可愛㗎！相比我嘅禮物，自己都覺得有啲Hea，（食咩慶祝？）我哋冇出街食，叫咗長腳蟹海鮮餐外賣咋！」6號更將與女友拆禮物的錫錫片分享到社交平台，不少網民都感覺到二人冧爆的甜蜜。