疫境秘密註冊結婚　馮凱淇嫁DJ囍雙馮

疫情嚴峻無阻愛，讀者報料，指歌手馮凱淇（Cherry）與電台DJ馮廸燊（Tiksan）已經完成註冊，譜出美妙人生樂章！

Cherry在社交網透露，由於剛推出新歌，行程排得密麻麻，「註冊原先諗住一切從簡，所以妝頭都是自己負責，婚紗亦選了一條最簡單的款式……期待年底的結婚派對！」Cherry解釋本來想邀請朋友、歌迷出席分享自己美好時光，但免得大家冒險外出和聚集，就只能暪過大家了，「因為疫情關係，所以今天沒有邀請到太多朋友，祝大家都身體健康，疫情快點過去…」談及婚後的感覺，Cherry說差別不大。二人在完成註冊儀式後興奮得跳起來，充滿愛！

Cherry接受東網訪問時表示因為疫情嚴峻才減少邀請賓客，否認有心秘婚：「哈哈哈，我哋拍咗3年拖。佢上年8月求咗婚啦，今年年底先擺酒。原先想邀請多啲朋友，歌迷過嚟影相嘅，但因為疫情關係，唔想大家冒險同聚集，所以瞞住大家。」至於在疫情下結婚，她說：「除咗影相同簽字一刻，全程都戴口罩，我哋係戴口罩嘅新人，一早排左期2月18日註冊嘅，都有擔心之前政府部門延遲復工時間會唔會有影響，好彩最後冇事。（結得咁急係咪有bb有？）我都估到有人會誤會，我未有喜，我哋呢段時間都會克制自己，因為12月要擺酒，如果真係依家有bb，就係最肥嗰時擺酒，唔可以囉。」她表示擺酒時會邀請藝人朋友，蜜月旅行會安排在擺酒之後。

問到結婚時的「愛的宣言」，她表示沒有講愛的宣言，只是讀誓詞，且讀得好好流暢，笑言：「因為我哋都係專業嘅司儀。」又指婚姻註冊處註冊過程超級快，5分鐘內已完，又表示：「 因為想擺酒當日多啲時間同賓客影相，所以將註冊提早咗。」。