溫碧霞拍法國電影　獲老公仔仔飛巴黎探班

藝人溫碧霞（Irene）在巴黎拍攝首部法國電影《Happy Night》，巴黎時間前晚（21日）完成煞科戲，老公Kenny與囝囝Xavier專程飛到巴黎探班送驚喜，令到孤身在外地拍戲的Irene見到兩父子出現冧到甜入心。Irene難掩興奮甜到漏說：「Kenny同Xavier特登飛嚟巴黎，我哋啱啱正在拍煞科戲，佢哋出發前兩日至通知我，話飛嚟探班，好開心呀，有小驚喜喇，時間啱啱好，剛好拍完，有幾日休息，可以一齊玩幾日，因為香港停課Xavier不用返學，飛嚟巴黎都好，呢度好舒服又不用戴口罩，陽光氣溫及空氣都好好。」

Irene與劇組相處十分愉快，煞科當天大家都依依不捨：「大家教我講法文，學咗好簡單幾句打招呼問好同多謝，呢部戲全部法國演員都係講英文，其中有一位法國演員中文超叻，導演穆斯塔法（Mustafa Ozgun）及部分法國演員都好鍾意中國歷史，覺得中國係一個好特別地方，又好鍾意中國人臉孔。」