唐貝詩陪至愛最後一程：有晒心理準備

藝人唐貝詩養有兩隻貓咪花花與雪雪，去年花花離逝大受打擊，現在雪雪亦進入倒數期，唐貝詩每日貓不離身，以行動陪伴雪雪最後一程，雖已有心理準備，但一提起亦不禁流下眼淚。

唐貝詩（Lydia）抱住雪雪出現，還帶了不少雪雪與姐姐花花的相片，表示當年帶回家時牠們只有手掌大，她說：「花花上年走咗好傷心，好彩佢冇咩病痛，去到最後先癱咗，手腳唔郁得，只得個頭郁到，走得好安詳，但打擊好大，喊咗好耐。」Lydia拍照時對雪雪呵護有加，她透露牠已20歲：「之前只係有老花，最近嚴重咗已經睇唔到嘢，又有高血壓。」問到會否擔心佢隨時離開？她忍不住流淚：「會，都好驚，所以更珍惜每一刻，我依家好少出街，雪雪好嗲，返到屋企佢就黐住我，夜晚又會同我一齊瞓。」

兩隻貓都很長壽，Lydia說：「應該係飲水多，同埋只畀貓糧佢哋食，不過最近我咩都畀雪雪食，佢好弱，我用盡方法氹佢食嘢，只要佢肯食嘢就得，同埋日日幫佢打皮下水。」Lydia謂花花離開後特別製造了一條頸鏈留念：「我用佢啲毛同骨仔整咗條頸鏈，到時雪雪走都會再整多條。」

Lydia是貓癡，所以一定會再養寵物，問到揀男友是否一定要鍾意寵物？她說：「一定要，我識嘅朋友都鍾意寵物。（依家有冇男朋友？）感情冇嘢可以講，除非落實晒，去到結婚先會公開。（有冇諗過幾歲結婚？）冇，唔想勉強自己訂幾多歲。（如果想生小朋友都係時候？）我冇諗過生，不過媽咪成日叫我生多啲，我冇理佢，隨緣。」

場地：DK Cuppa Tea