身在意大利！黃泆潼拍片報平安：冇去超市成個月

新冠肺炎爆發全球，其中意大利疫情較為失控，早喺今年二月飛到意大利嘅藝人黃泆潼，喺社交網拍片報平安，指收到好多朋友問候：「嘢食暫時都夠嘅，依家都開始用online shop，其實知道疫情殺到埋嚟嘅時候，已經冇乜去超級市場，已經成個月啦！」

黃泆潼話當地冇搶購潮，皆因有限購，所以物資都算係充足：「即使online shop同附近小店都有限購數量，尋日終於買到一條廁紙，啲米只可以買三盒，一盒唔係好大盒，兩三日就會食晒。」

但講到口罩呢方面，黃泆潼話嚟到當地都係買唔到，但慶幸香港朋友寄咗畀佢，解佢燃眉之急，好有雪中送炭感覺。