正印監場！鐵碧CP凍過水？試晒婚紗都冇用

處境劇《愛．回家之開心速遞》多對CP都大受歡迎，其中「鐵面陳」王致狄（Andy）及「Rebecca」沈可欣組成嘅「鐵碧CP」終於開花結果，即將拉埋天窗！惟最新一集講到「Mia」何綺雲及Rebecca同時遇上危險，「鐵面陳」第一時間選擇保護Mia，令佢終於意識到最愛是誰，亦睇到一班網民相當激動，好想快啲知「鐵面陳」最終究竟情歸何處！

講到山上遇險嘅戲份，Andy表示最難忘係拍攝野狗襲擊一幕，並大爆之所以能順利拍攝，全靠幕後功臣、沈可欣老公楊證樺，Andy說：「因為要天黑前完成呢場戲，但最後先拍狗仔戲份，所以都有啲困難，好彩楊證樺喺現場教導隻狗仔，我哋先可以順利天黑前完成。」佢又大賣關子，指劇中「鐵碧CP」雖然試晒婚紗計劃結婚，但最後結唔結得成婚，都仲係未知之數。