追求者送餐上門　李施嬅隔離期食到升Cup

藝人李施嬅早前從加拿大返港，即接受家居隔離14天，昨日隔離期已滿，今日即聯同無綫劇集《法證先鋒IV》拍檔陳煒、譚俊彥、黃浩然、海俊傑及監製梅小青到安老院派發防疫物資。

施嬅坦言返港後心情平靜得多，於隔離14日期間獲得朋友們滿滿的愛：「日日有人送嘢食嚟，兩星期冇出門口，連垃圾都係隔住門口，叫朋友幫手丟埋。」更指有朋友曾一日送她四杯凍奶茶，再加上蛋糕，令其不自覺增磅3公斤。

問到可有升Cup？施嬅笑說：「頭先試衫有啲位係窄啲，總之度度都均勻地升啦！係一啲愛的脂肪（有冇追求者送嘢食？）乜都有，但女士會煮埋飯放門口，如果係男士會加分（隔離完第一件事做乜？）整手甲，不過喺屋企咁多日再出行，心情真係有啲緊張。」談到加拿大的新劇因疫情停工，施嬅透露劇集有意於秋季播出，故劇組欲於6月再開工，但一切也視乎疫情進展而定。