羅家英隔離完出關　汪明荃眼罩夠晒潮

藝人羅家英早前喺馬來西亞參演英皇網劇《女法醫JD》，但因新冠肺炎，上個月廿五號已返港。在港家居離嘅家英哥終於夠十四日出關，太太汪明荃喺社交網上載咗張二人合照同大家報平安，佢話 ：「8/04/2020家英哥“出關”。咁快就過咗14天，唔辛苦嘅。也祝大家一切安好！」

一班粉絲見到都安心晒，不過好多網民就將重點放咗喺汪明荃同羅家英一身嘅造型上面，讚佢哋配搭得好新潮，連歌手吳若希都留言「呢個造型好型呀。」仲有網民問佢哋個眼罩喺邊度入貨，真係夠晒潮呀。