親筆信曝光！袁詠儀自揭過關心路歷程

藝人袁詠儀（靚靚）早前因內地劇復工由港飛返大陸，仲要坐完疫監先可以復工，本月15日終於完成隔離，一轉頭就被網民爆料話喺商場名店撞到佢豪花近百萬港元掃貨添，搞到佢火速澄清，甚至「淆底」刪Post！事隔數日，有網友就晒出靚靚於結束隔離前一日，寫下兩頁親筆信向辦事處人員致謝，仲意外被網民大讚字迹工整。

袁詠儀在信中向內地有關機構致謝，表示隔離期間令佢半生難忘，又回憶自己出發前勁擔心，包括點過關、坐車、去酒店等，但佢入到深圳灣口岸後，手續同檢測過程暢順，令佢所有擔憂、不安都消失，半小時就完成所有流程，並坐上去酒店嘅巴士。

網民睇到封親筆信後，唔少人就大讚佢字迹工整，不過都有網民突破盲點，笑言佢個簽名似足打風一樣，就算有人想冒簽都唔知從何入手。