唔識英文一頭霧水　麥長青等宣判結果

藝人麥長青（麥包）今日為遭人滋擾申請禁制令及索償一案上庭，惟大頭蝦記錯時間晨早便現身，至下午二時許再度折返，同行還有太太林孜。雙方代表律師經過兩個小時結案陳詞後，法官表示擇日宣判結果。

事後麥包於法院門外受訪，笑指不懂英文，故對庭上供詞一頭霧水，現時等待律師告知判決日子，對於他曾於作供表示事件令無綫對他失去信任，以及工作量大減，問到他有否感傷心？他說：「人生係要經歷，依家案件未有定案，所有嘢都係聽，冇人去Confirm我任何嘢，呢幾年我嘅工作，大家有目共睹，當年讀完書踏入社會就係入無綫，無綫係我母校，我冇怪過公司。」