被恐嚇兼侮辱！馬浚偉拒借錢遭失聯友人大罵

藝人馬浚偉今日於社交網發文，透露被一位失聯多年嘅朋友要求借錢，佢婉拒時更遭對方出言侮辱甚至恐嚇，令佢大感無奈：「日前收到一位失去聯絡很多年、也認識不深的朋友的短訊，來回數天，說到底，原來是借錢問題，但我們根本從來沒有甚麼聯絡、也沒有這份交情，也沒有任何信任的建基，我不敢答應似乎是正常的反應......結果，一堆難聽和威嚇的信息不停傳來，何必呢！」

雖然被辱罵，但佢亦保持風度，勸勉對方：「這位曾經認識的朋友，希望你能正面處理錢財問題，也不要再抱投機和賭博的心，這些貪念最終會把你害得很慘的！願你重新振作，勇敢面對和承擔自身的責任，加油！」

馬浚偉事後回覆東網表示：「舊同事嚟嘅，十幾年冇聯絡，當然我記得佢係邊個，我禮貌咁回覆佢。佢開聲就借唔少數目，6位數，而印象中佢喜歡投機同賭博，我點解會借呢？我有錢都留番開project，幫吓失業嘅同行啦，嚟緊我都會約吓無綫啲舊同事傾合作。坦白講，佢暗示會喺社交平台唱我，我行得正企得正，有乜好擔心呢？」