上海坐隔離監實錄　G.E.M.廁所爆機練歌

早前傳出和造型師男友Mark秘婚的歌手鄧紫棋（G.E.M.）已飛到上海開工，由於疫情關係，要配合隔離措施，和同行的Mark雙雙入住酒店後要「分居」十四天。

G.E.M.今日網晒短片稱十四天隔離已完成，描述隔離期間的生活日常包括做運動、睇書、練歌及透過視像功能跟外公談天說地等，更少有地見到她「四眼妹」素顏Look現身。

難得有長達兩星期的悠長假期，G.E.M.說趁機睇書及煲劇，在片中見她零化妝戴着眼鏡，邊食零食邊煲大熱西班牙劇集《紙房子》，她說已全部睇完外，又說特意帶了兩個巨型水樽，注滿水後可以充當啞鈴做運動。

至於練歌，她就在洗手間內開着電腦播歌狂唱，說選擇在洗手間唱歌，因為有回音，而且又不用因聲浪大而打擾鄰房的住客！