爭做無綫一姐！馮盈盈上堂學戲鑽研演技

自無綫花旦佘詩曼、胡杏兒、楊怡等離巢，一班無綫「姐仔」當然出盡法寶，力爭TVB一姐之位，馮盈盈早前便報名參加由鄭丹瑞主理之網上演技訓練互動平台「SHOW 8」，向一眾名導、視帝、影后劉偉強、黎耀祥、郭晉安、胡定欣、黃智雯等學習演技，增值自己，盈盈直言獲一班星級導師指點，獲益不淺，其中影后惠英紅之教導令她最感難忘，她謂：「紅姐（惠英紅）講佢如何練自己嘅眼珠，同埋用面部所有肌肉嚟演戲，令我非常佩服！仲有好多謝旦哥（鄭丹瑞）喺我每次拍好功課影片後都會畀我評語，最近一次仲讚我有明顯進步，好感動！（點解唔叫埋鄭衍峰一齊報名呀？）咁佢暫時主持工作較多嘛。」

鄭丹瑞讚有進步

經已上了六堂的盈盈，每次交功課都落足心機，連自我介紹短片都不忘以酒寓演技，很有心思，難怪鄭丹瑞都讚這位學生夠晒乖！他謂：「因為佢係藝人，所以我對佢嘅要求會嚴厲一啲，佢上咗幾個星期堂之後，真係見到佢嘅進步，尤其最近兩期功課，佢都畀到好多驚喜我，眼神運用得相當出色，亦願意拋低靚女包袱。」