【玄之又玄】坐位對正老闆房　一錯即炒！

經濟愈唔好，老闆就愈挑剔！其實呢個道理都唔難理解，心情唔好嘛，如果老闆為人一向苛刻，身為員工就更要打醒十二分精神！好似最近上映的一部電影《我老細係天后》，女主角就要以助手身份，服侍一位超大牌樂壇天后，經常被點東點西，有唔妥亦要吞聲忍氣，相信好多打工仔都有共鳴吧！

心理壓力大

喺風水學上，如果你嘅座位同高層房間（尤其係房門）對到正一正，絕對係大忌，因為經理室等高層房屬煞氣重嘅地方，若員工本身運滯，坐响呢個位置好易導致工作犯錯，最後更會被老闆炒魷魚！至於背向老闆房間坐，有被老闆監視嘅感覺，心理壓力勁大，一樣會影響事業運。

植物可擋煞

不過，打工仔坐咩位置邊有得揀，如果自己嘅座位犯咗風水大忌，惟有諗辦法化解。假如座位係對住經理室，可以喺枱頭擺放一盆植物擋煞，愈粗生嘅植物就愈「襟捱」。如果背向經理室而坐，椅背宜擺放屬土的東西當作靠山，例如掛上一件黃色、杏色或啡色的外套，有助你保住飯碗。