林作為愛出頭　出口力挽「失婚裕美」形象

藝人裕美同林作拍拖備受關注，唔少人以「失婚裕美」稱呼女方，今日二人齊齊開Live，裕美表示自己14歲出道，公司一直教佢有新聞就唔好回應，耐心等時間沖淡焦點，所以從冇為自己解釋。

反觀男友林作就為裕美被稱呼「失婚裕美」作平反，指失婚不等如低人一等，不解社會為何要咁樣稱呼離婚嘅女性，直斥有歧視成分！之後林作續指社會普遍對男士離婚就好似冇乜嘢咁，女人離婚就變得好大罪，更要配上「失婚」呢個名詞。林作更指好不解女性唔幫番女性，外界覺得裕美離婚就係有罪：「呢個現象好恐怖，遇到不公平就要出聲！」佢亦表示對女友裕美覺得「清者自清」嘅諗法唔認同。

之後二人又再拍片，裕美就再度否認自己整容，指當時只係跑步減肥，她說：「我塊面尖係因為我瘦咗勁多，同埋我啲頭髮，之前冬菇頭，就算依家我即刻戴番個假髮畀你睇，可以話畀大家聽，個樣完全係一模一樣，其實係冇分別，頭髮嘅重要性。我就嚟32（歲），乜嘢Baby Fat都冇晒咁濟……我就識得睇人哋有冇整過容㗎囉，啲人唔識得睇，就話你一定有整。」