《愛．回家》楊嘉欣同無綫完約　自嘲失業媽媽

處境劇《愛．回家之開心速遞》小花、有「隱藏美少女」之稱嘅楊嘉欣，於今年三月榮升人母，呢日佢喺社交網宣布已同無綫完約：「原來我入咗行四年幾，你哋記唔記得我？一個快工作了5年的地方...話完就完了......我一直心裏有個問號？真的？真的嗎？嗯~真的完了。還想著（着）生完BB仲可以同大家見面...哈哈.....多謝舊公司畀過咁多拍攝機會我，雖然我只係2打6，走左（咗）都唔會可惜，不過的確係一個與眾不同嘅經歷，又識到一班朋友仔，疫情過後朋友們唔好唔記得我，I will be back！」

佢又自嘲係「失業媽媽」，並指希望日後可以再喺其他平台同大家見面，有網友則指佢字裏行間似乎暗示不獲無綫續約。