舌戰莫少聰含屈32年　唐麗球被唱條脷好勁

久未露面的藝人唐麗球（波波）接受香港開電視節目《開工大吉77》訪問，與好友苑瓊丹分享圈中秘密。波波講起當年赴台拍劇，全因舊公司拒加人工：「當時開份約畀我，簽五年、六千蚊一個月，我求佢話加多五百蚊畀我啦，佢哋都唔肯，咁我咪走去台灣囉。當時人生路不熟，都冇換台幣就出發，第一日唔使拍嘢，點知等等吓肚餓，但周圍都唔收港幣，最終等劇組收工返嚟接濟我。」

波波回想1988年與莫少聰拍接吻戲，但烏龍百出成為佳話：「依家講番都唔好意思，當年第一次拍Kiss戲，唔識點樣做咪真係錫囉，事後阿聰周圍同人講，波波條脷好勁，將尋晚條菜都挑埋出嚟，從此都冇人搵我再拍呢類鏡頭喇。」

苑瓊丹自言跟波波的丈夫吳毅將相熟，經常都會通電話報告近況：「佢哋兩公婆都好Sweet，其實我同佢哋都識咗三十年。頭先佢提到個女出國讀書都喊出嚟，證明母愛幾偉大，佢笑自己老年得女，所以好寶貝。」