【繽FUN歲月】陶大宇鄧特希 傾盡《皇庭》經典

聽到呢首音樂，係咪咩感覺、回憶都返晒嚟先？無線經典劇集《壹號皇庭》，由陶大宇、歐陽震華、林保怡同蘇永康主演，當時佢哋星途只係一般，劇集話事人鄧特希亦只係新監制，92年首播嗰陣，仲只係一星期播一集，有邊個可以估到，《壹號皇庭》可以爆紅？

專業、中產、啜核，《壹號皇庭》為無線開創專業劇先河，之後愈拍愈有，足足拍足5輯，連王菲都曾經喺第2輯出場。《壹號皇庭》成為TVB律政劇神話，令陶大宇、歐陽震華成為一線小生，鄧特希亦成為金牌監制，之後製作出另一神劇《妙手仁心》，仲做埋由梁朝偉、李嘉欣主演嘅電影《俠骨仁心》導演。

《壹號皇庭》改變咗陶大宇同鄧特希嘅人生，呢對最佳拍檔碰頭，又點可以唔講呢套港產電視劇經典？《壹號皇庭》，正式開庭！

場地：朗逸酒店