湯洛雯食雪糕靚樣　馬國明睇到流晒口水

藝人馬國明與湯洛雯（靚湯）自公開戀情後愈愛愈煙韌，兩個不時喺社交網隔空傳情，靚湯之前更着上男友最愛嘅卡通人物唐老鴨T恤氹對方開心，仲四連發「唐老鴨專輯」，認真sweet到爆！

由於近日疫情嚴重，stay home抗疫嘅靚湯上載咗一張食雪糕嘅相片，留言話唔知幾時先可以再出去食雪糕，成個大細路上身，作為男友嘅馬國明即秒速呵番靚湯，留咗三個流口水嘅表情圖案，大讚女友省鏡！

雖然有眼利網友發現佢依然着緊唐老鴨T恤，不過今次網民就將焦點放喺第二度，先有馬國明老友胡鴻鈞咬住唔放，留言話：「兩隻匙羹一齊食啦！」之後有網友和應話：「你睇吓店員好貼心地畀咗兩隻匙羹啦」、「做咩會有兩隻羹㗎？一隻咪夠囉，你哋兩個用同一隻咪得囉！」睇嚟靚湯同馬國明呢對「螢火蟲」，網友仲有排玩呀！