困擾廿幾年！余香凝靠兩招解決便秘問題

女神余香凝皮膚好且身材弗爆，呢日佢就拍片公開解決便秘煩惱嘅秘方，教大家如何排毒Keep住健康Body！佢一開始自爆過去廿幾年均受便秘問題纏擾，即使進食生果、蔬菜、飲水都未能解決，更曾依賴酵素、藥物等，但始終治標不治本，直至近日終於覓得良方，佢感動表示：「喺我好絕望嘅時候，得到高人指點，佢每日起身都做兩樣嘢，先空肚飲暖水，再將水果切粒攪碎，當早餐食。因為空肚係最吸收嘅時候，吸收所有水果嘅纖維同維他命，可以幫助腸道蠕動。試咗呢個方法之後真係好神奇，我廿幾年嚟都未試過日日都去到廁所，我覺得好開心。」

佢又分享另一招，就係當便秘時，盡量放鬆心情，唔好畀太大壓力自己，令腸道放鬆，自然容易排便。