【只怕有心人】圈中肥仔變男神血淚史

2020年08月04日 18:00
東網電視
更多新聞短片
其實做胖子真係幸福得多。
真係唔好取笑你身邊嘅肥仔,一個華麗轉身,即刻變成肌肉型男!古語有云,只要有恒心,鐵柱磨成針,每個肥人都有一段減肥血淚史,蛻變之後,個個都係優質潛力股!
《調教你男友》Jeffrey
最近ViuTV真人騷《調教你男友》成為網民熱話,當中22歲的Jeffrey(魏浚笙)憑住靚仔外表再加上純真嘅性格,成功彈出成為網民新寵,但其實佢細個原來係肥仔一名,佢公開童年照中,有成三層豬腩肉,最高峰達190磅,靠住半年冇食晚餐,奉行168斷食減肥法(即每天斷食十六小時,並只在剩下的八小時內進食),只食番薯、西柚等低卡路里和高纖維的食物,再同時努力做gym,持續了一年減去四十幾磅。
Jeffrey曾發文寫道:「好好珍惜你們身邊的胖子!只能說每個胖子都是潛力股啊!期許自己能成為讓父母驕傲的小孩,但有時候當個胖子幸福多了你懂嗎?」
彭于晏
台灣男星彭于晏,喺近年作品《激戰》、《破風》等大晒精壯結實身形,收獲唔少女粉絲,大家都稱呼自己做彭太太,叫佢做老公,老中青通殺,其實彭于晏細個就愛吃,佢形容自己是看到桌上有甚麼東西,都要吃光!小學的他,身高才158cm的時候,體重就高達154磅。高三時體重已176磅,大學時期愛上打籃球先瘦下來。因合約問題,在事業低潮時一度想放棄做藝人,此時接下台灣電影《翻滾吧!阿信》演出體操選手,整整訓練加節食8個月,每天早上7點起身,開始訓練12小時,只吃水煮餐。練出44吋胸肌,6%的體脂,一度練到手破皮流血,拍畢後,彭于晏冇放鬆自己,繼續保持最好狀況,難怪佢話:「自律的人有多可怕。」
林德信
林德信(Alex)向來係圈中型男,仲係著名瑜伽導師,不過佢7歲時有180磅,人人都叫佢肥仔,去快餐店要吃2個巨無霸加薯條和雪糕先夠飽,直至做瑜伽先瘦了,不過Alex不喜歡節食,佢覺得好辛苦,心情又搞到好差,不過如果有工作要除衫就會操練兼戒口,食得很清淡,依家靠瑜伽一路維持住155磅。
劉浩龍
歌手劉浩龍(師兄)早前為演唱會出盡全力減肥,由一舊巨腩減到變六舊腹肌,足足減咗34磅,真係少啲決心都搞唔掂!當時師兄就喺社交網晒咗一段瘦身過程嘅短片,並留言:「沒嘗過痛過便無法前進,愈痛苦的訓練會能達到成果,這個過程,完全不是和別人比較,而是和自己孤獨戰鬥,經歷心理上不同的情緒,我曾經低落沮喪,厭倦,但亦為着身體能克服了不可能而感到難以言喻的興奮,當孤獨戰鬥完結,不單只是身體,就連精神也變得更加堅強,我答應自己,這是送給自己最好的禮物。我會繼續努力。」
陳奐仁
音樂人陳奐仁(Hanjin)以前形象肥嘟嘟,從來都冇人話佢肥係唔好睇,相反仲好多人覺得佢好可愛,但有一日佢做做身體檢查,發現身體內臟脂肪過高,容易引致血壓高同心臟病,為健康着想,開始的起心肝減肥。
Hanjin不時喺個人社交網上載艱苦訓練片段,訓練內容以Strength Training(力量訓練)及Cardio(帶氧運動)如踩單車為主,鍛煉肌肉以達消脂效果。用咗8個月時間,由180磅減到158磅,Hanjin稱做運動,需要很大付出,有時晚上身體也會十分痛楚,其心得不止是要有毅力,最重要是勤力,因相信惟有勤力才會有成果。減肥成功後嘅Hanjin自信爆棚,更笑言想轉型做跳唱歌手。