公路勇救貓貓　莊思明決定收養Highway

藝人莊思明向來鍾意小動物，上月佢揸車途經公路時勇救貓貓Highway，並帶回家暫時照顧，而本身養開狗嘅佢，幾經考慮終決定正式收養Highway！

佢喺社交網晒出抱住貓貓嘅合照，並指好開心見到貓貓嘅轉變：「歡迎Highway正式成為我屋企嘅一分子啦！見到你由原本好惡唔鍾意人行近你，唔鍾意人抱你，到依家你慢慢學識同人相處，會主動叫人同你玩，睇到你有咁嘅轉變我真係好開心！多謝你畀我係公路上遇到你，希望你以後都能夠健康快樂地生活，我最希望就係你同Haru可以成為好兄弟。I love you Highway！」佢亦上載Highway同狗狗Haru相處嘅片段，見佢哋不時追逐、打成一片，非常融洽。