搵陳偉琪拍MV　鄭世豪又被鬧廢柴老公

歌手鄭世豪在無綫《愛‧回家之開心速遞》飾演的細龍生是愛妻號，即使畀細龍太（陳偉琪）日日鬧廢柴、垃圾老公，但細龍生一樣咁愛細龍太。

早前細龍生就用歌手身份送左件禮物畀劇入面離開咗佢嘅細龍太，呢首新歌《只准你話我是傻》是由世豪親自填詞，當中歌詞亦有兩人劇入面充滿經歷、歷練嘅愛情故事。

點解寫歌畀Vicky（陳偉琪）？他笑說：「上一首歌《等得太久》我有分享畀佢，但佢幾日都冇覆我，之後開劇時先知佢因為我冇搵佢演MV女主角嬲咗我幾日。所以當我知道細龍太即將要離開我一段時間，我就有靈感要為佢寫一首歌，配合我哋劇中嘅愛情故事，仲搵咗Vicky做女主角先夠貼切，喺MV結尾，導演都加咗條伏線…希望會延伸番劇集去成就呢個大團圓。」

談到拍MV最難忘嘅事，世豪說：「因為我哋都合作咗一段時間，所以談情部分我哋都好快可以配合到，反而有一幕係我哋要喺沙灘玩水，我就NG咗好多次，搞到佢濕晒身，又畀佢鬧我廢柴老公。」