美食婷：粉的疑惑（中）：中式糕餅點心用乜粉？

上星期美食婷我介紹咗幾款常用嚟埋芡醃肉嘅食用粉，今日就介紹幾款常用嚟做糕餅點心嘅粉，尤其係中式糕點，多數會用到糯米粉、粘米粉同澄麵。而呢幾款粉亦以米或穀物為原材料，主要作用係增加黏稠效果、口感同透明度。

糯米粉 Glutinous Rice Flour

以糯米為原材料製成嘅粉，黏度較粘米粉高，質感柔軟、香糯，

蒸熟之後口感煙韌，多數用於來製作湯圓、麻糬、年糕、糯米糍等。

粘米粉 Rice Flour

由大米磨製而成，黏性較糯米粉低，蒸熟後口感較滑，多數用嚟製作蘿蔔糕、芋頭糕、缽仔糕等，可以增加食物口感，以及有效保留形狀。

澄麵 Wheat Starch

由小麥提取嘅生澱粉，無筋性，所以完全無黏合力，最大特點係蒸熟後呈半透明狀，常用於製作蝦餃、粉果皮等。