林珊珊大女孖DJ舊愛玩浮潛　網民推測已復合？

藝人林珊珊大女李澄（西瓜）上年同拍拖多年嘅電台DJ傑傑分手，當時傑傑已經融入西瓜屋企兼見晒家長，唔可以喺埋一齊令唔少人都覺得可惜！不過世事無絕對，呢日西瓜同傑傑喺社交網晒出孖住到主題公園玩浮潛嘅相，即時令唔少網民留言嗌佢哋復合！

根據西瓜喺社交網所講，因為今次玩浮潛要兩個人一齊參加，最終佢揀咗傑傑做伴，不避嫌揀「舊愛」仲大方晒相，有網民更加推測佢哋其實已經復合咗，只係藉今次機會鋪定路等宣布復合，不過亦有冷靜嘅網民希望大家都畀啲空間佢哋。

而今日喺電台節目上，傑傑被一眾DJ及鄭裕玲「逼供」，傑傑就解釋因為之前同西瓜一齊養嘅愛貓離世，所以佢哋再聯絡番。而今次呢個浮潛活動，其實係西瓜嘅工作，本身佢係搵阿妹野人去，但因為對方染咗髮驚甩色，所以西瓜就搵咗傑傑去。傑傑雖然冇承認係復合，但就話將來嘅事將來再算！