體重跌破90磅！張惠雅自爆下巴爆瘡原因

前女子組合HotCha成員張惠雅（Regen）早前上載布滿瘡疤嘅腳相及下巴爆晒瘡嘅爛面相，令網友非常之擔心，大受皮膚問題困擾嘅佢認真禍不單行，最近佢再上載一張量體重嘅相，圖中顯示只有88.8磅，再度跌穿90磅，情況令人憂心，佢留言話：「返到屋企就開始胃痛定唔知腰痛，瞓覺就出汗，94磅嘅我，今日已經跌穿90，依家個人仲係好攰，瞓覺仲係會標汗。」早於上年Regen疑受情困瘦到皮包骨，體重跌至得番84磅，當時已經嚇壞唔少人，體重之後雖然略有回升，不過依家又受皮膚問題困擾，體重再度跌破90磅！

解開謎團

事件曝光後，Regen表示收到好多朋友嘅慰問，並喺社交網解開迷團：「斑就唔係好擔心，因為我有去開嘅醫學美容，咩斑都打得走，痕癢嘅地方已經少咗，自己有留意過多數係膽經位置痕癢，讀過下兩年Part Time中醫，唔多唔少都會了解狀況。不過因為自制能力真係太低，太為食、太鍾意飲酒，休息又唔係好夠，有試過放血，出咗好多瘀血，但係啲風邪好鬼祟。」

Regen話曾試過胃部經絡走罐，生瘡同痕癢，其實係啲風邪同毒：「睇過中醫話我陰虛火旺非常嚴重。瞓覺有時會嚴重標汗，上個星期喺舖頭開工嗰幾日，太熱，自己又吹風，身體應該入晒風，又出咗太多汗，令到陰虛火旺更加嚴重，之後嗰幾日我就發熱腰痛胃痛。」

對於下巴嘅暗瘡，原來同醬油蟹有關，佢話：「呢段時間都戒緊酒同戒辣，下巴問題應該都幾肯定係內分泌同腸胃有關，所以之前食咗兩次醬油蟹，應該係最致命嘅原因。衰為食，依家開始我都唔會再食了，多謝關心刷完存在感同關心，瞓完個覺開心晒。」