東網電視
更多新聞短片

韓國男團EXO成員的內地男星吳亦凡,尋日(31日)因涉嫌強姦罪被依法刑事拘留,事件之大已極速引起全球關注,有網友竟然突破盲點,發現原來內地搖滾天王汪峰正正就係尋日山西太原開騷,基於「汪峰效應」(即汪峰有重大決定公布時,必定會有大新聞發生),繼今年年頭鄭爽代孕棄養事件,今次吳亦凡捲涉嫌強姦罪將成為汪峰最大「戰績」。

「汪峰效應」愈嚟愈勁。

佢尋日一開騷,吳亦凡就出事…
今次醜聞引發連串事件,好似吳亦凡同上位小花楊紫合演嘅劇集《青簪行》,早前就已經被網爆推出無期,二人為劇集拍足一年,本身有指欲將吳亦凡被AI換臉後定檔本月上映,不過依家肯定冇上映機會,即令「#心疼楊紫」嘅話題升上熱搜。

新劇拍咗成年,點知都係得個吉。

今次連AI換臉都救唔番。
另外又有唔少藝人偷偷進行「割席」,好似內地諧星李雪琴就將過往有關吳亦凡嘅發文刪除,連二人合照都冇得留低;編劇六六早年曾公開發文維護吳亦凡,如今佢都即刻出Post指自己睇錯人,明顯轉風向,人人喊打。

唔少藝人都選擇同吳亦凡割席,將佢喺自己圈子「消失」。
除咗吳亦凡外,早前被警方爆吳亦凡同都美竹有性關係,都美竹即被網友發現佢將自己個名申請註冊商標,申請日期為今年7月;另早年放出同吳亦凡床照嘅網紅Gina,亦將網名「小G娜」申請商標,同吳亦凡相關嘅女士都紛紛為自己「維權」。

相反,都美竹事件發生後,分分鐘有錢賺!