做過童星抗壓力特高！吳諾弘晒拍拖點滴公開向女友示愛

今日（1日）與奧運金牌得主張家朗出戰奧運花劍團體賽嘅吳諾弘（Lawrence），曾經以童星身份演出過《心花放》、《最美麗的第七天》和《酒店風雲》等多部電視劇，佢喺比賽完結後，跟團隊一齊接受無綫獨家視像訪問。

Lawrence話做全職運動員係兒時夢想，又話做全職運動員都係為咗參加奧運：「都係一步一步嚟，你話有咩驅使我，可能係我想爭取更加好嘅成績。」主持人陳庭欣（Toby）問佢會唔會因為以前拍過無綫劇，有豐富演出經驗，而令佢抗壓力特高，佢話︰「其實我啱啱好緊張，我前一晚瞓唔到㗎，但我諗都會有啲幫助嘅，因為可能相對地多cam（鏡頭）嘅時候唔會太驚，場上我緊張，你哋睇唔到啫。」

現年21歲嘅Lawrence除咗有家人支持，原來仲有個女朋友陪伴佢左右，社交網仲有個專屬「相簿」，記錄低拍拖點滴，包括慶祝情人節、聖誕節，又大晒情侶手機殻，早前佢哋先慶祝完周年紀念，Lawrence公開留言「Love You」，相當Sweet！