台慶︱炎明熹唔敢同咪神鬥性感　對身材零信心

「新人王」炎明熹（Gigi）率領一眾「聲夢」學員今晚（19日）亮相台慶紅地氈，姚焯菲、鍾柔美、詹天文、文凱婷、冼靖峰都有現身，當中以Gigi一襲蛋糕雪紡裙最靚，她表示全身打扮由公司安排，面對同場一眾前輩性感登場，問到日後可會向她們挑機鬥性感？她笑說：「都係交畀公司決定。（咁着會嚇親姑丈？）應該唔會，因為更驚嚇佢都見過，應該嚇佢唔到，佢係一個好勇敢人。（對自己有信心？）冇！（可能仲會發育呢！）都係，但我希望長高啲，但唔想再長肉。」

談到《叱咤樂壇頒獎禮》將在ViuTV播放，成為「叱咤生力軍女歌手」大熱的她屆時可會出席？Gigi表示：「希望出席到，但未知！（你呼聲高！）希望啦，獎冇人嫌多，唔會成日去諗令自己有壓力，順其自然。」更指去年台慶首次以新人姿態見大家，如今一年後以另一身份登場，可謂感慨良多。