喪拍抑壓戲搞到抑鬱？林家棟：咪拍多兩部喜感戲囉！

藝人林家棟今晚（20日）現身奧海城為其主演的電影《智齒》謝票，他表示有些朋友看完後，覺得套戲看完好壓抑，他希望從自己角度去逐一拆解劇情，讓觀眾有所思考，他對有內地粉絲來港包場觀看電影，感到好開心。提到正與郭富城（城城）和任賢齊（小齊）拍攝新片，已差不多完成廟街的部分，現在於李鄭屋邨取景，因戲中又跑又跳動作多，又要駕車又多追逐，已連續兩天凌晨六點通告，收工便直接前來謝票，而今晚他會走勻3處謝票，故笑言「謝咗」！

他又說：「啲人叫我拍番多啲喜感少少嘅戲，成日話我呢幾年愁眉苦臉，好抑壓！（會唔會有抑鬱？）唔會抑鬱，但唔會笑臉迎人囉，自己唔覺，係朋友話我唔歡容，不自覺地唔開心，希望嚟緊拍多兩部開心戲。」他說與城城和小齊拍攝十分順利，尤其萬歲有助拍攝更加順暢，預計新戲拍到聖誕，可能冇機會玩，但覺得工作緊要，笑言幾嚮往在聖誕燈飾下開工，別人消費時他就收錢，感到很開心。他透露手頭有幾個劇本，有監製亦有演員的，他說：「啲人話我太慢，幾年先拍一部。（你要求高？）但我質素低嘛！講笑，想做好啲。」